Ministri Gashi pret ekipin e filmit fitues “Martesa”

Prishtinë | 05 Dhj 2017 | 18:20 | Nga

Ministri i Kulturës, Rinisë dhe Sportit, Kujtim Gashi, ka pritur në takim ekipin e filmit fitues “Martesa” të regjisores Blerta Zeqiri.

Ministri Gashi përgëzoi Zeqirin dhe ekipin e filmit “Martesa” për arritjet e tyre dhe suksesin e filmit, i cili ka triumfuar në festivalin prestigjioz PÖFF | Tallinn Black Nights Film Festival, me çmimin e kritikës “Fipresci Prize”, si dhe me çmimin special për ansamblin e aktorëve në kategorinë “First Feature Competition” në Gala mbrëmjen e organizuar në Tallinn të Estonisë.

Ai u shpreh se sukseset që po tregojnë artistët tanë jashtë kufijve të Kosovës, po ndihmojnë në krijimin e një imazhi të mirë për Kosovën, andaj këto rezultate janë motivi më i mirë për të vazhduar përkrahjen edhe më të madhe për punën dhe performancën e tyre. Ministri garantoi se Ministria e Kulturës, Rinisë dhe Sportit do të rris përkrahjen edhe më tutje në realizimin e projekteve të tyre.

Sipas një komunikate të MKRS-së, regjisorja e filmit, Blerta Zeqiri, falënderoi ministrin për pritjen e tij dhe përkrahjen e Ministrisë. Ajo tha se puna e tyre nuk do të ndalet me kaq, por do të punohet edhe më shumë në prurjen e sukseseve të tjera me qëllim të promovimit të vlerave filmike të vendit tonë.

Fjalë Kryesore:

Të ngjashme