Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë kundër Korrupsionit ka mbajtur mbledhjen e radhës ku në rend dite ishte shqyrtimi i propozim-vendimit të Qeverisë për kandidatët për drejtor dhe zëvendësdrejtor të Sekretariatit Ekzekutiv të Agjencisë për Krahasim dhe Verifikim të Pronës dhe shqyrtimi i Projektligjit për Përgjegjësinë Disiplinore të Gjyqtarëve dhe Prokurorëve.

Kryetarja e Komisionit, Albulena Haxhiu në fillim të mbledhjes shprehu pakënaqësinë e saj në lidhje me propozimin për zëvendësdrejtor, Naser Shalën, raporton Ekonomia Online.

Sipas saj, Naser Shala është personi i njëjtë i cili ishte i përfshirë në përgjimet e aferës “Pronto” dhe se personi në fjalë nuk duhet përkrahur këtë propozim të Qeverisë dhe  të propozohet për një pozitë të tillë.

“Naser Shala nuk e di a është personi i njëjtë i cili ka qenë i përfshirë në përgjimet e aferës “Pronto”, por nëse është i njëjti atëherë Qeveria ka gabuar shumë dhe propozoj që këtë çështje ta shtyejmë për mbledhjen e ardhshme”, tha Haxhiu.

Sipas saj, është e papranushme që të dërgohen persona të tillë në krye të detyrës së zëvendësdrejtorit që s’ka integritet profesional e intelektual dhe nuk është e drejtë që të propozohet dikush që është i përfshirë në këto përgjime.

“Kam respekt për secilin ushtar të Ushtrisë Çlirimtare të Kosovës, por nuk kam respekt për ata që e kanë shfrytëzuar luftën për t’u pasuruar më pas”, shtoi Haxhiu.

Anëtari i Komisionit Shkumbin Demaliaj, njëherësh deputet i Aleancës për Ardhmërinë e Kosovës, i doli në mbrojtje Naser Berishës. Ai tha se ky person është qytetar i Republikës së Kosovës dhe ka të drejtë të aplikojë në cilindo institucion të Republikës si çdo qytetar tjetër.

“Naser Berisha është njeri i ndershëm i Ushtrisë Çlirimtare të Kosovës edhe ka të drejtë me apliku në institucione, nuk kam asgjë private dhe nuk mundeni me i thanë kriminel dikujt që s’e njohim aspak dhe meqenëse ka ardhur propozimi deri këtu, atëherë ne si Komision duhet ta trajtojmë të tillë dhe duhet të ecim përpara”, tha Demaliaj.