Vartësit e ministrit të Brendshëm, Skender Hysenit, i “ndreqën” të vetët. Brenda një dite i çuan në burg 59 policë, të dyshuar për marrje të ryshfetit dhe keqpërdorim të detyrës. Ryshfetin na e lanë “bakshish” otomanët. Ky ves i kundërligjshëm nuk matet me centë. Habitesh, kërkon që të “qerasin” me 5 euro…, ngulesh, shkon te vendi. Madje, ç’është më e keqja, fluturon nga puna.

Policët e doganës dhe të trafikut rrugor, shqiptarë dhe serbë, e kishin mbushur kupën. Kupa u zbraz brenda një dite. Vartësit e Skendës (Hysenit) ndërmorën aksionin e rrufeshëm. I paraburgosën të vetët, të dyshuar për marrje të ryshfetit dhe keqpërdorim të detyrës.

Ndodhi rrëmuja, “rusvaji” policor, i pazakontë, i paparë në praktikën gjyqësore të pasluftës.
I çuan brenda hekurave 59 policë.
Gjykatësit e procedurës paraprake, të Mitrovicës dhe Prizrenit patën punë me ta dy ditë, meqë lënda e tyre ishte e “trashë”.

Ua caktuan masën e paraburgimit dhe të arrestit shtëpiak.
Shteti s’i kurseu të vetët. Ligji vepron “erga omnes”, njësoj për të gjithë, pra edhe për policinë.
Për ta u tha se kishin marrë ryshfet, prej 5 deri në 50 euro.

Ky akt i kundërligjshëm s’matet me centë. Habitesh, pranon që të “qerasin” me 5 e më tepër euro, shkon te vendi. Madje, ç’është më e keqja, fluturon nga puna.

Këtë ves otomanët ua lanë “bakshish” popujve të Ballkanit.
Ç’është ryshfeti ?

Ryshfeti nënkupton: Para ose diçka tjetër që i jepet falas nën dorë një nëpunësi ose punonjësi në detyrë që të bëjë një punë a një shërbim jashtë ligjit.

Sinonim i ryshfetit është korrupsioni. Fjalën “korrupsion” e përdorin më tepër politikanët, por edhe gratë e katundit, këto të fundit thonë: “Nuk o puna mirë, na myti korrupsioni…”.

“Korrupsioni” është fjalë e burimit latin që në interpretim të lirë do të thotë: Bashkëndarje – Unë ty, ti mua.
Policët, jo vetëm në Shqipëri, Kosovë, Mal të Zi, Serbi e Maqedoni, haptazi kërkojë që t’ua “qerasësh” një kafe. Kafja mund të të kushtojë shtrenjtë.

Para luftës, milicia e Milosheviqit shqiptarët i torturonte në mënyra të ndryshme. I detyronin ngarësit e makinave që të shkojnë në filan kafen, të porosisin për ta pula në hell, raki, birra… Fatkeqi nuk e prishte lojën, u thoshte: “Razumem shefe” (U bë shef).

Matanë Shkodrës, në pikën kufitare të Malit të Zi i ke banderolat me vërejtjen: “Paraqiteni korrupsionin në këta numra të telefonit…”.

“Rusvaji” i vartësve të Skëndës (Hysenit), i tremb keqbërësit, të mos shkelin në zonën kriminale.
Kur polici shkel ligjin, ç’pret prej të tjerëve.

Ryshfeti s’është fruth, është sëmundje, dukuri që lë pasoja.
Çka piqet, vështirë hiqet.