Ministrja e Integrimit Evropian, Dhurata Hoxha, ka pritur sot ministrin e Punëve të Jashtme të Finlandës, Timo Soini, me të cilin diskutoi për perspektivën evropiane të Kosovës, të arriturat dhe sfidat e këtij procesi, si dhe shprehu përkushtimin e institucioneve për të punuar me shume dhe prodhuar rezultate.

Pasi ka falënderuar ministrin Soini për angazhimin e gjithanshëm të Finlandës në ngritjen e institucioneve demokratike dhe procesin integrues, ajo ka thënë se “Finlanda ka dhënë kontribut të jashtëzakonshëm në proceset nëpër të cilat ka kaluar Kosova, me vështrim të veçantë në integrimin e saj në organizatat ndërkombëtare dhe procesin integrues. E falënderova Ministrin për ofrimin e përkrahjes edhe më tej”.

Sipas komunikatës për media, ajo po ashtu ka vënë në pah nevojën e qytetarëve tanë për liberalizimin e vizave.

Ministri Soini ka theksuar se angazhimet institucionale për zbatimin e MSA-së janë proces që do ta mbështesin sikurse edhe proceset e mëtejme integruese dhe liberalizimin e vizave.

Ai ka theksuar rëndësinë e fuqizimit të gjyqësorit dhe pavarësinë e tij, sidomos nga ndikimet politike.

Ministrja Hoxha theksoi se procesi integrues është prioritet dhe konsensus nacional, si dhe mirëpret përkrahjen e vendeve mike, si Finlanda, për të realizuar sa më shpejt liberalizimin e vizave, ashtu që qytetarët e Kosovës të mos jenë të diskriminuar në raport me tërë rajonin e Ballkanit perëndimor.

Gjatë vizitës në Kosovë, Soini është takuar  me presidentin Hashim Thaçin, e do të takohet edhe me kryeministrin Ramush Haradinajn e ministrin e Punëve të Jashtme, Behgjet Pacollin.

Ministri Soini ka mbajtur fjalën hyrëse me rastin e hapjes së projektit të binjakëzimit të Bashkimit Evropian, të udhëhequr nga Finlanda, në forcimin e shërbimit korrektues dhe sprovues në Kosovë.

Vizita në Kosovë është pjesë e turit në Ballkanin Perëndimor, ku ndër të tjera ai do ta vizitojë edhe Maqedoninë dhe Serbinë.