Mbahet seanca e jashtëzakonshme për Raportin e Komisionit Evropian

Prishtinë | 20 Pri 2018 | 08:26 | Nga

Në Kuvendin e Kosovës sot do të mbahet seancë e jashtëzakonshme lidhur me Raportin e Komisionit Evropian.

Kryesia vendosi që sipas kërkesës së 40 deputetëve nënshkrues, që në orën 12, të mbahet seancë e jashtëzakonshme.

Më 26 prill, ndërkaq, do të vazhdojë seanca e ndërprerë dje, me pikat e mbetura.

Një javë më pas, më 3 maj, Kuvendi do të mblidhet në seancë të re, në të cilën do të shqyrtoj disa projektligje dhe çështje të tjera.

Kështu, fillimisht, deputetët do të shqyrtojnë Projektligjin për Ratifikimin e Traktatit ndërmjet Republikës së Kosovës dhe Hungarisë për Ekstradim,
Projektligjin për përgjegjësinë disiplinore të gjyqtarëve dhe prokurorëve, si dhe atë për Amnistinë.

Më pas, pritet të emërohen drejtori dhe zëvendësdrejtori i Sekretariatit Ekzekutiv të Agjencisë për Krahasim dhe Verifikim të Pronës, si dhe të formohet Komisioni Ad-hoc për përzgjedhjen e kandidatëve për një anëtar të Bordit të Radiotelevizionit të Kosovës nga komuniteti shqiptar.

Seanca do të vazhdojë me shqyrtimin e Propozimit të Grupit Parlamentar të Lëvizjes Vetëvendosje për shkarkimin e nënkryetares së Kuvendit, Aida Dërguti, si dhe të propozimit të Grupit Parlamentar të Lidhjes Demokratike të Kosovës, mbështetur edhe nga deputetët nënshkrues të grupeve të tjera parlamentare për formimin e Komisionit Hetimor Parlamentar në lidhje me shpenzimet për lobim nga ana e Presidencës dhe Qeverisë të Republikës së Kosovës.

Fjalë Kryesore:

Të ngjashme